Our guest columnist Moses Bako is here with his latest round of match day five preview in pidgin English. You’got to like it.

As na two matches remain for the 2019 NWPL to end, the race for Super 4 don dey hot. We dey here to give una the latest aproko for week five games.

For Group A, FC Robo don siddon kakaraka dey wait Rivers Angels for Lagos make dem fight the battle for top of the table.

The wahala be say Rivers Angels wey dey on top of the group no wan gree make FC Robo overtake dem and the Lagos Landladies say na Atlantic ocean Rivers Angels go come look for Lagos as dem no get time go bonny Island.

For the other match for Group A, Delta Queens say if no be fine wey dem go fine Osun babes e better say make dem no come Asaba at all, because na on top dem, dem go pour all the vexination wey dey dia body now.

Meanwhile Osun Babes don go market go buy Okro say dem go try cook draw soup with Delta Queens make Asaba people rest from Banga soup. D match go tie wrapper, no be small.

For Group B, Adamawa Queens, don prepare to waya Heartland Queens, dem say e better make Heartland Queens bring dia bulala dem self because d bulala wey dey Gombe wia dem go play the match get “shukushuku” for body and as dem dey flog dem dia body go hear am, but the ‘Ihedioha’ Ladies don yarn say dem go carry ‘Amadioha’ join body go Gombe, as dem no go gree at all for Adamawa Queens.

Edo Queens wey just follow Adamawa cook draw soup for Benin, dey vex seriously and dem no go take am easy at all with DreamStars Ladies. As everything dey on line including their job. So Edo Queens don sure say na 3 points or nothing but Dreamstars sef no wan gree, dem say wetin go happen for Benin go do Benin people like “Dream” abi na ” Film Trick” we go call am.

For Group C, Kaduna Queens cut people ticket last week as dem waya AITEO Cup Champions Nasarawa Amazons 2-0 for Kaduna. Bayelsa Queens don talk say dem go flog dem for house, but the Kaduna Ladies don talk say no be who first call police dey win case o. Say no be small bulala Bayelsa Queens go chop But Bayelsa Queens say na dat day dem go be d first team wey go qualify for Super 4.

Meanwhile, Nasarawa Amazons say dem no ready to play with Sunshine this Wednesday say dem go postpone d match because government wan use stadium that day but Sunshine Queens say Nasarawa Amazons just move the evil day forward say nothing spoil.

Another top of the table battle na em dey Group D, Ibom Angels don dey prepare well well, to put pepper for Confluence Queens eye to take stop dia unbeaten run but Confluence Queens like Osun Babes don waka go market, buy Ogbono, Okro and Snail to cook better draw soup for Ibom Angels backyard, say make Akwa Ibom people no chop Afam and Edikaikong soup dis week.

Invincible Angels say dem no wan play play-off for relegation, say make Abia Angels goalkeeper carry basket come Markudi come “collect that thing” go back house.

Abia Angels too don ready to give dem “that thing” too. So who go collect “that thing”..Till Wednesday we go know.

September 3, 2019

Leave a Reply

Your email address will not be published. Required fields are marked *